| ๕๐๑๏ ซวาดๆช้างย้องย่าง |
แกมลวา |
| ชาวบนกวนสั่งสาว |
เสียงฮ้อง |
| เททรวงฮ้อนฮมกระหาย |
หิวสวาท |
| เจ้าจากน้องอวนน้อง |
จากเฮียม ฯ |
| ๕๐๒๏ คึดฮ่อเจ้าจงจอด |
คำเสนห์ |
| เมืองๆ ภายบนเขาล่วงเมือ |
เมืองฟ้า |
| ลิวลิวข้ามคูหา |
หลายหลั่น |
| มัวมืดฟ้าเขียวสิ้ว |
ช่อเหลือง ฯ |
| ๕๐๓๏ ถักถั่นไม้ช้องช่อ |
เขียวนิล พุ้นเยอ |
| กลายที่ นาเนืองเถิงท่าเพียง |
เมือหน้า |
| เมื่อนั้น ภูมินทร์เจ้าเจืองลุน |
ล้านมาศ |
| คึดพี่ผู้นงหน้า |
หมื่นกระสัน ฯ |
| ๕๐๔๏ รือจัก นิราศฮ้างฮามฮูป |
เฮียงตน ได้เด |
| ลำลำผันลูบนาง |
นงหน้า |
| บาไทท้าวทรงกระสัน |
คึดคั่ง |
| หน้าต่อหน้าสงวนชู้ |
ช่างชม ฯ |
| ๕๐๕๏ ญั่งๆน้ำย้อยเนตร |
นองไหล |
| ยินอาฮมคั่งปาน |
เปนบ้า |
| ดูดั่ง ฮามเฮือนแก้วกูไกล |
กินโศก เวรนี้ |
| พระพี่ คึดเพื่อหน้าคนิงไว้ |
แว่นทรวง แด่เนอ ฯ |
| ๕๐๖๏ เมื่อใด ลุโชคได้โดยดั่ง |
ปรารถนา |
| บุญยวงยศยิ่งทาง |
ไทอ้าง |
| เจียมแต่ สองสมสร้อยสารา |
ใช้สู่ |
| ทุกที่เฮื้องนครกว้าง |
แผ่ผาย ฯ |
| ๕๐๗๏ ยังจัก มีคู่ช้อนฮมเพื่อน |
ภายกู บ่เด |
| เหมือนที่ คำเสนโหแห่งฮา |
ฮอยล้ำ |
| ชะบุเนื้อเร็งโญ |
ยินโศก |
| เจ้ายี่ซ้ำแถมถ้อย |
กล่าววอน ฯ |
| ๕๐๘๏ ในโลกล้นทุกท่วย |
ญิงชาย |
| เวราจรแจกเจียร |
จำม้าง |
| จัดหมายหมั้นไมตรี |
สัจจเที่ยง ได้รือ |
| มัดแม่งฮ้างฮามหม้าย |
อยู่กระสัน ฯ |
| ๕๐๙๏ เปนแว่นไว้คำเสี่ยง |
ขนงใจ |
| มีคองอันจื่อมา |
จำแจ้ง |
| แต่นั้น ศรีใสง้อมเกลียวความ |
ต้านตอบ |
| พี่ก็ อดอยู่แล้งลืมเข้า |
ขาดแลง ฯ |
| ๕๑๐๏ ก็เพื่อ คึดคอบน้องทุกค่ำ |
ราตรี |
| เปนดั่ง กินยาแสลงปวดนูม |
ในเนื้อ |
| ขอแก่ ภูมีไท้ฮมเพิง |
คนิงมาก ปางนี้ |
| พระค่อย คูนอ่อนแก้วกูเกื้อ |
เพื่อนองค์ แด่เนอ ฯ |
| ๕๑๑๏ พี่ก็ อดอยู่ถ้าเยื้อนยาก |
เททรวง |
| เยียวว่า ขวัญเฮียมออนเพื่อประจง |
เถิงน้อง |
| ดวงมโนห้อยหนอวน |
อันประเสริฐ |
| ลอนว่า มาอยู่พร้อมเฮียงห้อง |
ดั่งฝัน ฯ |
| ๕๑๒๏ กำเนิดนี้ฮู้ว่า |
แวนถนัด |
| เมื่อนั้น บาไทผันฮ่อเฮียม |
ชมช้อน |
| อยู่เยอ กษัตริย์สร้อยศรีไว |
แวนยิ่ง กูเอย |
| น้องจากเจ้าฮมฮ้อน |
ฮ่ำคนิง พี่ถ้อน ฯ |
| ๕๑๓๏ เมือเยอ พระหลิ่งเนื้อเจ้าพี่ |
แพงขวัญ |
| ขวัญอย่าออนฮอดเฮือน |
เฮียงห้อง |
| ไสสันไท้ทรงเมือง |
ท้าวฮุ่ง |
| เทื่อนี้ น้องจากเจ้าทรวงฮ้อน |
ฮ่ำคาญ ฯ |
| ๕๑๔๏ จักดุ่งดั้นดั้นดุ่ง |
เมือเมือง ก่อนแล้ว |
| อาการเปนดั่งเฮา |
แฮงต้าน |
| เมืองๆเหลื้อมแสงสูรย์ |
สุริเยศ |
| ง้อมม่วนเจ้าสินล้าน |
ลวดวอน ฯ |
| ๕๑๕๏ น้องจัก เดินเทศแท้เมือสู่ |
นาคอง ก่อนแล้ว |
| เยียวท่อ นานมาขวัญอ่อนออน |
อวนไข้ |
| ชะบองเนื้อผันเฮียม |
แล้วเลิก |
| ชลเนตรย้อยยมไห้ |
ทั่งแถว ฯ |
| ๕๑๖๏ ดีแก่ ลมเบิกไม้สร้อยสั่น |
สาขี |
| แกวๆ เขาแองคอนสั่งสาว |
เสียงฮ้อง |
| ใผหาก ลอนลืมม้างไมตรี |
หลงหล่า |
| ลืมพี่น้องลวงลิ้น |
โลภมี ฯ |
| ๕๑๗๏ หล้างจัก เปนเผดฮ้ายแฮมป่า |
หิมะพาน พุ้นแล้ว |
| พันวัสสามาขวบปี |
ก็ยังหั้น ฯ |
| ๕๑๘๏ แต่นั้น สว่าๆ ต้านอะเห่ยปาก |
หุมหัว |
| โสสาทานที่เฮา |
แฮงอ้าง |
| ทำใดให้เปนมัว |
ต้อยต่ำ |
| นอนแนบท้างในหม้อ |
หมื่นปี ฯ |
| ๕๑๙๏ เมื่อนั้น สาวฮ่ำถ้อยต้านตอบ |
แองคอน |
| ใผหาก วางตูหนีช่างแถน |
ดูถ้อน |
| เมือเมืองแล้วหลายกลอน |
การยาก |
| เมียอยู่บ้านดาค้อน |
ข่มแขง ฯ |
| ๕๒๐๏ คอนก็ ฮับพากย์ถ้อยแถวถี่ |
แถมคดี |
| นงแพงกูอย่าไถน |
ทางนั้น |
| บาศรีเจ้าเจืองลุน |
แล้วเลิก |
| ขึ้นขี่ม้าเดินดั้น |
ดุ่งทาง ฯ |
| ๕๒๑๏ ดีแก่ ลมเบิกไม้ค้อข่า |
แคมผา |
| เนียนๆจงจอดนาง |
ในห้อง |
| ดีแก่ งุมงอมไม้สันภู |
เท็งเหล่า |
| แซวฮ่ำฮ้องเฮียวเฮี้ย |
ส่งเสียง ฯ |
| ๕๒๒๏ ทุกขอกห้วยแห้มเผ่า |
ไฟฟอน |
| กลอยแฮงเฮวฮอดเชียง |
เซาม้า |
| ภูธรขึ้นเมือเท็ง |
โฮงราช |
| เยื้อนข่ำผ้าชมไว้ |
แว่นทรวง ฯ |
| ๕๒๓๏ ภูวนาถน้อยฮักพี่ |
เชียงเครือ |
| คอนคอนคึดซู่ลวง |
เลยข้อง |
| ปานนี้ นูเนือเนื้อนงคราญ |
พระพี่ กูพุ้น |
| มโนนาถน้องแฮมฮ้อน |
เฮ่งกระหาย ฯ |
| ๕๒๔๏ แม้งนึ่ง วันคลาดค้อยคลาที่ |
คันธร |
| ทังหลายเลยเลิกลา |
ลงห้อง |
| บาไทเมี้ยนเมือนอน |
เท็งแท่น |
| เยื้อนข่ำผ้าทังซ้อง |
พี่ชม ฯ |
| ๕๒๕๏ ฝูงแกว่นใช้ลดม่าน |
ลงขอ |
| ยินอาฮมห่างแลง |
นอนแล้ง |
| ปานนี้ ละออเนื้อนงปราง |
พระพี่ กูพุ้น |
| ดีแก่ เดือนเฮื่อแจ้งเจียรฟ้า |
ส่องใส ฯ |
| ๕๒๖๏ ท้าวฮุ่งฮ้อนทุกที่ |
ทนสะออน |
| โอยโอยคึดคั่งใน |
นานม้อย |
| คอนคอนค้ำราตรี |
ใกล้ฮุ่ง |
| เจ้ายี่น้อยใจแจ้ง |
จอดนาง ฯ |
| ๕๒๗๏ พุ่งพุ่งพร้อมเสียงไก่ |
กลอยขัน |
| ดีแก่ สูระพางเฮืองเฮื่อแสง |
ใสขึ้น |
| คนนันก้องบาดาล |
ดังมี่ |
| คื่นๆก้องลูกสาก |
สาลี ฯ |
| ๕๒๘๏ ท้าวฮุ่งเมี้ยนคลาที่ |
เมือเติน |
| มุนตรีเขาคว่างคอน |
คนเจ้า |
| ดีแก่ ทายเหินหน้าดวงบาง |
บานแบ่ง |
| ผู่ที่เหง้าคนิงชู้ |
ชั่วไกล ฯ |
| ๕๒๙๏ ทุกแห่งข้ำไขจ่อ |
จาวจี |
| บาไทคึดฮุ่งใจ |
จงง้อม |
| ภูมีเจ้าเจืองหาญ |
หิวสวาท |
| คึดฮุ่งผู้คิงค้อม |
ลูกเม็ง ฯ |
| ๕๓๐๏ เดือนสี่เสี้ยงใสสอาด |
ปงหงาย |
| บาก็ เต็งคำควรสั่งคอน |
แควนแจ้ง |
| มึงเญียะ ไปเถิงเจ้าหอลาย |
ง้อมม่วน นั้นเนอ |
| บัดนี้ น้องอยู่แล้งลืมเข้า |
ห่างเภาว์ ว่าเนอ ฯ |
| ๕๓๑๏ ฟังยิน ฮว่านๆฟ้าดังสนั่น |
เสียงเนือง พุ้นเยอ |
| ชวนเฮียมไปเพื่อนเฮา |
ผาเฮ้า |
| แหนแก่ บุญเฮืองสร้อยศรีใส |
โสมฮาบ |
| น้องก็ คึดจอดเจ้าแพงช้าง |
คั่งทรวง ฯ |
| ๕๓๒๏ โสภาพนี้ลอนอยู่ |
ทังตรอม นั้นดาย |
| ผาอาเจียมแต่ฮา |
ลางเข้า |
| เปนดั่ง ไปเสียไข้ผอมเหลือง |
ให้สว่าง ดีดาย |
| มึงจ่ง ไหว้อ่อนเจ้าใจแจ้ง |
จื่อกลอน ฯ |
| ๕๓๓๏ ผ่อดู พ่างๆฟ้าเฟ็ดฟีด |
สูรย์ใส พุ้นเยอ |
| คอนก็ เอ็งชุลีเลยเลิกลา |
ลงห้อง |
| ไหไหม้ามโนพราว |
พับแล่น |
| ดีก่อ ลมลวาดไม้ดังก้อง |
เแกว่งปลิว ฯ |
| ๕๓๔๏ ทุกขอกห้วยมีแท่น |
ควรนอน |
| ลิวลิวลวาฮีบแฮง |
เฮวผ้าย |
| แม้งนึ่งเถิงที่ นครหลวงชั้นเชียงเครือ |
พลอยจอด |
| มัวมืดต้ายเลียนเหล้ม |
เลียบเพียง ฯ |
| ๕๓๕๏ คอนก็ ขึ้นฮอดแล้วเนานั่ง |
ในหอ |
| เลยลวด เฮียงคดีเดิมดั่งบา |
เอาไหว้ |
| ฟังพอแล้วนางงาม |
ขานขอบ |
| อันว่าชวนพี่ หว้ายหว่างไม้ไปเฮ้า |
สว่างกระสัน ฯ |
| ๕๓๖๏ ความชอบไท้ผู่ผ่าน |
นครขวาง กล่าวแล้ว |
| ดูดั่ง ยังเคืองอันฝ่ายเฮา |
ฮมเฮ้า |
| ฮอยว่า ไททานถ้อยโสมศรี |
ต้านประมาท |
| บ่กว่า เจ้าติ่วสร้อยบาท้าวส่องญาณ |
หั้นถ้อน ฯ |
| ๕๓๗๏ แต่นั้น คอนพาดถ้อยฮับพากย์ |
พลอยสนอง |
| สานๆเสียงกล่าวนาง |
ในห้อง |
| อันนี้ เปนคลองแท้บูฮาณ |
ลาวเก่า |
| เจียมว่า น้องท่านเจ้าจำข้า |
ฮีบแฮง ฯ |
| ๕๓๘๏ คึดเง่าง้วนเมามาก |
มัวใจ |
| อันว่า สองแพงบุญขอดกัน |
กำเต้า |
| ใผ่ห่อน ไพความต้านสินบา |
บุญมาก |
| คอนค่อยซ้องประนมเจ้า |
ว่องวอน ฯ |
| ๕๓๙๏ เมื่อนั้น ง้อมปากต้านฮับพากย์ |
พลอยหัว |
| ออระชอนยวงกล่าวถาม |
เถิงเถ้า |
| เมื่อนั้น ฝูงลัวพร้อมอามกาน |
นบนาถ |
| น้องท่านเจ้าชวนแท้ |
ชอบไป ฯ |
| ๕๔๐๏ นางก็ ผัดผาดถ้อยแปรสั่ง |
บัวทอง |
| มึงเญียะ ไขคำเมืองกล่าวกลอน |
เถิงเถ้า |
| บัดนี้ บุญกองเจ้าขาซาย |
ใช้กล่าว |
| ชวนลูก หว้ายป่าไม้ไปเฮ้า |
ฮ่มผา ฯ |
| ๕๔๑๏ มันจิ่ง เฮวด่วนขึ้นไข่ข่าว |
เทพี |
| มาดาคึดผ่อเล็ง |
เลยต้าน |
| เพิงที่ นงศรีเจ้าจอมนาง |
น้อยแม่ไปแล้ว |
| ยังชอบผู้แพงล้าน |
จิ่งชวนนั้นดาย ฯ |
| ๕๔๒๏ เจียมแต่เถ้าประถมเก่า |
ลาวลาง |
| มวลกันไปสิ่งเดียว |
โดยด้าม |
| แต่นั้น บัวทองต้านนางงาม |
ง้อมม่วน |
| ดีก่อ ลมเบิกคู้ดังข้าม |
ข่วงเชียง ฯ |
| ๕๔๓๏ ผ่อดู ฮังฮ่วนพร้อมเพ็งดอก |
บงบาน พุ้นเยอ |
| นางก็ เฮียงคดีเดิมสั่งคอน |
แเควนแจ้ง |
| อันว่า นงคราญใช้ชวนเฮียม |
ฮู้ชอบ จิงแล้ว |
| น้องอยู่แล้งฮามเข้า |
ห่างเภาว์ ว่ารือ ฯ |
| ๕๔๔๏ อันนั้น ประกอบแก้วกระสันอื่น |
เอาพาง อ่อนเอย |
| เฮาบ่ ขีนมาดาค่อยไป |
ดอมน้อง |
| แม้งนึ่ง แองคอนไหว้นางคราญ |
แล้วออก |
| ขึ้นขี่ม้าอานต้อง |
ล่วงคราว ฯ |
| ๕๔๕๏ หลิงดู ทุกขอกห้วยเฮืองเฮื่อ |
ทองหลาง พุ้นเยอ |
| ฮมฮม เสียงชะนีฮ่ายปาว |
ปีนไม้ |
| เดินทางเท้านาคอง |
คราวเค่ง |
| ขึ้นสู่ไท้ธรรม์ต้น |
ลูกจอม ฯ |
| ๕๔๖๏ แล้วเปล่งถ้อยง้อมสั่ง |
เอาถวาย |
| เร็งโญถนอมขอบเฮียม |
ทังป้า |
| ปิปายเจ้าเจืองลุน |
ต้านคว่าง |
| ป่าวเพื่อน ไว้พุกหน้าไปเช้า |
ชู่คน ฯ |
| ๕๔๗๏ ผ่อเห็น สูรย์สว่างค้อยลงลุ่ม |
ภูซวาง พุ้นเยอ |
| บาคราญคึดคลั่งวน |
แวนหม้อม |
| ภูธรขึ้นเมือปรางค์ |
นอนเน่ง |
| เขาคว่างพร้อมลาจาก |
โฮงขวาง ฯ |
| ๕๔๘๏ ดีก่อ ลมเป่งพร้าวพัดยอด |
จวงทอง |
| เฮืองๆดาวเดี่ยวนาง |
นอนชู้ |
| เหมือยนองฝั้นหลายหลึม |
ทุกหมู่ |
| คือฮูปช้างไชชู้ |
เผ่นโขง ฯ |
| ๕๔๙๏ ชะพู่ตั้งถ้อยถี่ |
ถันงาม |
| วาโยโยงเบิกเฟือน |
เลยม้าง |
| เมื่อนั้น บุญคามไท้เจืองลุน |
แล้วตื่น |
| เจ้าติ่วช้างผายน้ำ |
โสรจสรง ฯ |
| ๕๕๐๏ ฮื่นๆแก้ช้างอาบ |
วังเพียง |
| นงคราญลุกพรากมา |
เกยแก้ว |
| ดีท่อ ลมไกวพร้าวเฮียงถัน |
สร้อยควี่ |
| เมี้ยนสว่ายหน้าแครงแล้ว |
เล่าจา ฯ |
| ๕๕๑๏ ทุกถี่เค้าง้าวแห่ |
เขนบัว |
| ผาลาเขาคว่างพาย |
พลพร้อม |
| พะนัวไม้เหมือยฮวาย |
ฮำยอด |
| ผู่ที่เหง้าคีงค้อม |
ค่อยวอน ฯ |
| ๕๕๒๏ เจ้าทอดถ้อยถวิลสั่ง |
มาดา |
| แองคอนทังพวกพล |
พลายแส้ |
| ราชาขึ้นพานคำ |
ย้ายย่าง |
| เห็นดอกไม้บานแต้ |
หล่นเหลือง ฯ |
| ๕๕๓๏ ซู่หว่างห้วยค้อข่า |
แคมภู |
| ฮังเฮืองบานจ่อจี |
จาวสร้อย |
| จอมภูไม้ลางลำ |
เลียนหมู่ |
| หอมอ่อนสร้อยเขาเฮียก |
มะเนวัน ฯ |
| ๕๕๔๏ เปนคู่พร้อมบานแบ่ง |
ฮางชาย |
| วาโยยันเบิกเฟือน |
เฟือยกู้ |
| พังพลายค้อยเถิงแดน |
เมืองพี่ |
| นกฮอกฮ้องชมชู้ |
สู่คอน ฯ |
| ๕๕๕๏ ทุกที่เที้ยนจาวจ่อ |
บุปผา |
| ภูธรเถิงท่งนา |
เซาช้าง |
| ก็จิ่ง สั่งความให้หาคอน |
มาถ่าง |
| มึงเญียะ ไปสู่ง้อมธรรม์อ้าง |
ม่วนเมือง ฯ |
| ๕๕๖๏ เมื่อนั้น อ้ายคว่างย้ายช้างอยู่ |
ยังแคง |
| บุญเฮืองจัดสั่งความ |
ประนมน้อม |
| แม้งนึ่ง ลวาแขงเข้าเมือใน |
แล้วจอด |
| ขึ้นสู่ง้อมธรรม์ต้น |
ค่อยบน ฯ |
| ๕๕๗๏ เจ้าทอดถ้อยถวิลบอก |
ทาสา |
| สนสน เขาฝูงฮามหมู่สาว |
สงวนย้อง |
| ลางคนข้อยดำกา |
เขาไถ่ |
| ย้องหยั่นเสื้อลายแป้ |
แปลกนาง ฯ |
| ๕๕๘๏ ลางพ่อง แนวชาติชั้นเชื้อไพร่ |
ฮิมของ |
| ชุมนึ่ง คีงนวลปรางหนุ่มใส |
โสมหน้า |
| ชุมนึ่ง ญองญองเสื้อจันจาว |
เขาแขบ |
| คีงคาดผ้างามล้วน |
ซู่คน ฯ |
| ๕๕๙๏ ชะแลบเนื้อขึ้นใหญ่ |
คำแดง |
| ตาคมคอยคู่คน |
ควรย้อง |
| ชุมนึ่ง ดำแดงเสื้อนวนออน |
ผิวอ่อน |
| คำคาดผ้าแดงพร้อม |
พร่ำหลาย ฯ |
| ๕๖๐๏ หมักหม่อนหน้าแล้วล่ำ |
เล็งดู |
| จอมมโนอกทะหว่าแด |
ดาดิ้น |
| เล็งแลเยี้ยมเพิงดู |
คิ้วคาด |
| ขอเปน พี่น้องใกล้ดอมดั้ง |
แด่เฮียม ฯ |
| ๕๖๑๏ สะพาดเนื้อสาวถ่าว |
ถนอมภู |
| โสมเสงี่ยมงามเงื่อนพรหม |
เพียรแต้ม |
| เสนาพร้อมเพ็งผอง |
อ้ายเกื่อน |
| ประดับหมู่พร้อมอวนเจ้า |
คู่คน ฯ |
| ๕๖๒๏ ควาญเกี่ยวช้างชักแทบ |
เทียมเกย |
| สนสนเข้าออกเวียง |
ยามเช้า |
| พลยวงเท้านาเพียง |
แถวท่ง |
| ผายแผ่นล้านเลยล้ำ |
ล่วงไป ฯ |
| ๕๖๓๏ ทะล่งด้าวเดียรดาษ |
แพนทอง |
| เสนานำม่วนเมือ |
เถิงท้าว |
| พระองค์ย้ายทุงญู |
บังฮ่ม |
| ช้างแนบน้าวเฮียงเจ้า |
จากลง ฯ |
| ๕๖๔๏ เมื่อนั้น โสมสันสร้อยศรีไส |
แขวนเหนี่ยว |
| เชิญท่าน เจ้าแผ่นกว้างปุนตั้ง |
ม่านวัง ก่อนเถิ้น ฯ |
| ๕๖๕๏ ค้อมกล่าวแล้วจับลูบ |
เชยชม |
| สองศรีคราญฮ่วมเฮียง |
กงแก้ว |
| นักสนมล้นเสนา |
เนืองนั่ง |
| ประดับเสื่อแล้วเลยกั้ง |
ม่านมุง ฯ |
| ๕๖๖๏ เจ้าจิ่ง ให้จ่าซ้อนชวนฮีบ |
ครัวควาย |
| พลีกำผีหมู่กำ |
เปนด้ำ |
| ปุนปายพร้อมทุกขัน |
ขวัญคู่ |
| พระพี่น้องสองเจ้า |
นั่งเฮียง ฯ |
| ๕๖๗๏ หลายหมู่เมี้ยนตั้งแต่ง |
กินดอม |
| เจืองจิ่ง ทวยสาลีบอกบน |
บานด้ำ |
| ขุนจอมเมี้ยนเมือพรหม |
ลดชั่ว มากิน |
| คูนก่ำพร้าสองก้ำ |
ก่อกวม ฯ |
| ๕๖๘๏ ปลูกลูกน้อยนี้ค่อย |
คงเสถียร |
| ญูท่าง ชมสายใจแจ่มนาง |
นอนช้อน |
| สวัสดีแท้เทียรฆา |
เย็นอยู่ |
| ยูยี่อ้อนชมชู้ |
ชั่วมรณ์ ฯ |
| ๕๖๙๏ ชะพู่หน้าท้าวฮ่ำ |
ไฮความ |
| เลยลวด เชิญสายสมรม่วนเมือง |
กินแล้ว |
| ในถันถ้องฮามฮอย |
ฮ้อยส่ำ |
| ทุกที่แผ้วผิวพร้อม |
พ่องถอย ฯ |
| ๕๗๐๏ ข้อยข่ำน้ำยอยื่น |
พานคำ |
| สอยวอยสุดสว่ายมือ |
เช็ดผ้า |
| ธรรม์ยำง้อมงามเสลียว |
สาโรจ |
| เฮียงฮ่วม เจ้าลุ่มฟ้าเทียมไท้ |
แทบบา ฯ |
| ๕๗๑๏ มะโนชเนื้อเจ้าพี่ |
พลอยแถลง |
| (สนองคำบาบ่าวเจือง |
จาชู้ |
| เฮาก็ มวลมาหลิ้นผาแดง |
ดูสว่าง |
| ทุกที่เฮ้าฮมฮู้ |
ฮ่างกลอน) ฯ |
| ๕๗๒๏ บัดนี้ควรที่ ไปสู่ถ้ำผาด่าง |
โดยเฮว ชอบแล้ว |
| แองคอนถือดาบตาว |
เทียมเจ้า |
| สาวสนมใช้หลายแสน |
ถือเครื่อง |
| ง้อมม่วน ผู้แห่งเหง้าคลาพร้อม |
พรากไป ฯ |
| ๕๗๓๏ สะพาดพร้อมท้าวใหญ่ |
เจืองหาญ |
| ภูธรทวนพี่เฮียม |
เถิงถ้ำ |
| ดีแก่ สาวนันเข้าผาจวง |
พร้อมบ่าว |
| ง้อมม่วนเจ้าเทียมน้อง |
บ่คลา ฯ |
| ๕๗๔๏ แต่นั้น สาวถ่าวเมี้ยนประดับหมู่ |
เหมือนกัน |
| แองคอนแยงหมู่สาว |
ไขชู้ |
| มือชอนเสื้อผันนม |
น้าวจูบ |
| เสียงอ่อนโอ้โอยเจ้า |
กล่าวอาย ฯ |
| ๕๗๕๏ มือลูบไล้เอื้อยมุ่ง |
พันแขน |
| มือสวานฮัดโฮบเอา |
เฮียงหน้า |
| ฮานี้ แนนนำเกี้ยวกุมกัน |
ลงเกิด แลซาม |
| เอื้อยมู่งผู้นงหน้า |
จิ่งจา ฯ |
| ๕๗๖๏ กูก็เปนดั่ง เถ้าแก่ฮู้หลิ้นหลาก |
เสินงาน นี้เด |
| พลหลามหลายคั่งเหลือ |
ในถ้ำ |
| ภูบาลผู้เปนอาว |
อ้ายคว่าง |
| มันก็ แยงฝ่ายก้ำเขาอ่อน |
อามกาน ฯ |
| ๕๗๗๏ แต่นั้น ม่างม่างนิ้วเฮียงแนบ |
เพิงจา |
| ดูดั่ง เสียงคราญเลยบ่กวน |
กุมน้อง |
| บัวทองผู้เก็งญา |
ยังถ่อง |
| เถ้าจ่าซ้อนใจพร้อม |
เพศคอน ฯ |
| ๕๗๘๏ อ้ายผ่องพร้อมฝูงหมู่ |
นงฮาม |
| เขาก็ กวนบายแขนกอดคอ |
เชยคั้น |
| ลางคนข้องพวงหนาม |
เกล้าควี่ ก็มี |
| ลางพ่องสิ้นเขินเนื้อ |
นั่งเปลือย ฯ |
| ๕๗๙๏ เสี่ยงมี่ฮ้องเฮฮ่อน |
ในดง |
| คอนเคยบายแนบนม |
กวนคั้น |
| มีคนล้มพออาย |
อับปาก |
| เสียงสนั่นก้องในหั้น |
มี่นัน ฯ |
| ๕๘๐๏ หมีหมู่ฮ้องวีว่อน |
ว่าวางก่อนเถิ้น |
| ขุนเญียเลยฮีบมือ |
มีช้า |
| ภูธรท้าวเจืองหาญ |
หัวปาก |
| ง้อมม่วน ผู่จิ่งหน้าเลยฮ้อง |
เฮ่งเสียง ฯ |
| ๕๘๑๏ ตั้งว่า มาม่วนให้ล่ำบาก |
หัวใจ นี้เด |
| เมื่อนั้น แองคอนเชียงฮีบเฮว |
ขานเจ้า |
| ใผผู่ พาโลแท้ไปกวน |
กุมเพื่อน นั้นเด |
| สูบ่ยำท่าน เจ้าติ่วสร้อยมาตั้ง |
แข่งงาน เพื่อนรือ ฯ |
| ๕๘๒๏ แม้งนึ่ง เถิงยอดถ้ำไพรเถื่อน |
เฮียงองค์ |
| ยอเทียนยวงเฮื่อฮาว |
เฮืองไต้ |
| ภูธรท้าวประนมมือ |
นบบาท |
| ขอให้ได้ธรรม์อ้าง |
อย่านาน พระเอย ฯ |
| ๕๘๓๏ ขอให้ ประกอบเกื้อทุกชาติ |
ยาคลา |
| ใจเผือเคยค่องกัน |
กลอยถ้อย |
| อันที่ เพิงใจตั้งปรารถนา |
พระโผด จิงเถิ้น |
| ให้บาปน้อยบุญกว้าง |
ข่มขวาง ฯ |
| ๕๘๔๏ อันว่า นารกไว้ฮ้อยโยชน์ |
ยาเห็น |
| แต่นั้น จอมนางนบนอบมือ |
ดอมน้อง |
| ใจเผือข้อยอันเดียว |
ดูค่อง กันแล้ว |
| ใจหากพ้องเพิงฮ้าย |
อย่ามี ฯ |
| ๕๘๕๏ ปากปล่องส้วยเสมอดั่ง |
ฮูเข็ม |
| ไฟแดงจรทั่วคีง |
คุมไหม้ |
| แม่นว่า คนเต็มพื้นชุมพู |
ทำบาป ก็ดี |
| ถ้าว่า ยังโลภใว้เดียวข้อย |
หากทรง ฯ |
| ๕๘๖๏ เมื่อว่า ใจหากแจ้งถือชื่อ |
คือความ |
| อนตายสังอย่ามี |
มาพ้อง |
| ขอตามไท้ภูธร |
เทียมพ่าง |
| ทุกชาติใช้นำน้อง |
อย่าคลา ฯ |
| ๕๘๗๏ เขาพรากพร้อมเฮวฮีบ |
เลยคืน |
| ทังบาคราญพี่ตน |
นางง้อม |
| ภูธรผู้หะรึไท |
ท้าวฮุ่ง |
| ม้มปากถ้ำเถิงค้าย |
ข่วงเพียง ฯ |
| ๕๘๘๏ คันฮ่มกั้งลมดุ่ง |
ดวงศรี |
| แตรสังข์เสี่ยงปี่เพ็ง |
พานสร้าง |
| หาญพายผู้ใจขวาง |
ไหว้อ่อน |
| ควรที่ ผู้แห่งเหง้าบุญกว้าง |
แกว่งคอน ฯ |
| ๕๘๙๏ หมักหม่อนหน้าง้อมม่วน |
พลอยขาน |
| เยียคำทังคว่างพาย |
อาวซ้อน |
| เขาก็ ยวงหลานซ้อยสินกอง |
ตั้งอยู่ |
| ง้อมม่วน เจ้าติ่วสร้อยลาพร้อม |
พรากไป ฯ |
| ๕๙๐๏ สาวถ่าวเมี้ยนประดับหมู่ |
เฮียงกัน |
| ไสว เขาแองคอนอยู่เพียง |
พลอยต้าน |
| ยมมะนาผ้าปานผง |
ผืนอ่อน |
| แพรแขบเข้าหลายฮ้าน |
เฮื่อเฮือง ฯ |
| ๕๙๑๏ เฟื่องๆเสื้อแดงอ่อน |
เหลือหลาย พุ้นเยอ |
| เฮืองๆวันส่องสี |
ใสแจ้ง |
| ชะลอนแก้มเฮียงพา |
ตั้งฮอด |
| ผู่แจ่มเจ้าป้าท่าน |
บัวทอง ฯ |
| ๕๙๒๏ แล้วทอดถ้อยจำผอก |
ผายสวาง |
| หลานก็ วางนาคองล่วงมา |
เห็นหน้า |
| หิ้งนางล้ำเชียงเครือ |
ง้อมม่วน มากิน |
| ไห้เที่ยว ได้ฮ่วมผ้าเจืองท้าว |
ที่ประสงค์ ฯ |
| ๕๙๓๏ หิ้งปากถ้ำทันด่วน |
ผาจวง มากิน |
| ตูก็ มีใจจงจอดสู |
สมสร้าง |
| หิ้งสาวล้ำนครหลวง |
ล้านกาบ มากิน |
| ฮักอย่าม้างขอหมั้น |
หมื่นปี ฯ |
| ๕๙๔๏ หิ้งบ่าวชู้น้อยท่าน |
ไทไกล มากิน |
| แกวๆ เสียงแองคอนกล่าวความ |
ใยหลิ้น |
| มิฮ่างว่า จักอาลัยดั้งฝูงตู |
เสียท่า นี้รือ |
| ง้อมม่วนให้ฟายแก้ม |
ชู่คน ฯ |
| ๕๙๕๏ สาวบ่าวเข้ากินฮ่วม |
เฮียงพา |
| ญิงชายปนแปกกัน |
กวนต้าน |
| ตาคอยเหลื้อเหลียวดู |
ดอมแด่ |
| ขายี่เจ้าทองล้าน |
ย่อมวอน ฯ |
| ๕๙๖๏ แต่นั้น ง้อมอว่ายหน้าหลิงล่ำ |
ลักหัว |
| ฮอมไมตรีกล่าวสาว |
สองก้ำ |
| เพิงกลัวแท้ไทเดียว |
ยาเชื่อ เฮาเอย |
| แก้มย่อมช้ำฮอยแข้ว |
ขาดใน ฯ |
| ๕๙๗๏ อันนี้ เหมือนเข้าถ้ำดอมราช |
เร็งญา |
| ศรีใสสุกควากหัว |
เลยต้าน |
| ราชาไท้แปงกลอน |
แควนเที่ยว |
| ง้อมม่วน เจ้าสินล้านปุนต้าน |
สั่งคดี ฯ |
| ๕๙๘๏ มือถ่วงถิ้มค้อนดอก |
มาลา |
| ภูธรฮับฮีบเอา |
เลยได้ |
| เร็งโญผู้ใจคาม |
คนิงตอบ |
| ค้อนดอกไม้บายถิ้ม |
ถืกเฮียม ฯ |
| ๕๙๙๏ ใจประกอบข้าชั้นยี่ |
ขุนยน |
| สาวนงเสงียมแกว่งคอน |
มาพร้อม |
| ญนๆบ้างเหลืองแดง |
สิ้วแฮ่ม |
| ขายี่ผู้ใจแจ้ง |
ชู่คน ฯ |
| ๖๐๐๏ ชะแลบนิ้วเกี้ยวกอด |
หาคอน |
| คอนชะโลมพลอยถืกนม |
ฮนฮ้อง |
| บางยีเที้ยนแสนแวน |
พ้นเพื่อน |
| แฮงดั่นดิ้นตีนข้อง |
ท่าวหงาย ฯ |
