๓๔
| ๓๓๐๑๏ เจียมแต่ ฮู้ข่าวน้องเจียระจาก | เชียงเครือ |
| เฮียมก็ เต็งคำเสนห์ฮุ่งเถิง | ทุกมื้อ |
| คึดเมื่อ พลแพนอ้อมหลายเหลือ | ล้นท่ง |
| พี่ก็ เยียวท่านฮื้อเทม้าง | ยาดเมือง ฯ |
| ๓๓๐๒๏ แม้งนึ่ง ผู้ก่งท้าวถือหมู่ | พลอวน |
| เฮียงพลายชนหมู่แกว | กอยม้าง |
| เทื่อนี้ ญูสงวนหลิ้นโฮงสิง | พร้อมคู่กันแล้ว |
| ดูอ่อน เจ้าโลกกว้างคือคู่ | ตาตน ฯ |
| ๓๓๐๓๏ ชะพู่เนื้อง้อมม่วน | ฮับขาน |
| ทางกังวลแห่งอวน | หลายห้อง |
| อันนึ่ง วางสถานไว้เขินคีง | น้าออกเฮียมพุ้น |
| มาฮอด เจ้าพี่น้องดีได้ | แต่ตน ฯ |
| ๓๓๐๔๏ ขอบพี่ ละอ่อนน้องไว้นอก | ปลายใจ |
| คำกังวลจิ่งจักหาย | เสียฮ้อน |
| โสมใสแก้วนางแกว | แก้วอู่ |
| ตูก็ คึดจอดเจ้าธรรม์อ้าง | ใคร่เห็น ฯ |
| ๓๓๐๕๏ ผู่ที่เหง้าพร้อมคู่ | คำเสนห์ |
| ประสงค์สันลุเพื่อบุญ | บาท้าว |
| ขอแก่ เร็งโญให้กูณา | นามต่าง |
| ง้อมม่วน เจ้าหมื่นม้าวขานข้อ | ขอบคดี ฯ |
| ๓๓๐๖๏ บัดนี้ เฮาพี่น้องมาฮ่วม | เคหัง |
| เปนไมตรีสืบสาย | สมสร้าง |
| ของหลังค้ำคูนมา | ได้คอบ |
| เฮียมย่อมอ้างเถิงเจ้า | ชู่คน ฯ |
| ๓๓๐๗๏ เมื่อนั้น เขาขอบเจ้าจอมมิ่ง | เชียงเครือ |
| ผนผนลวาคั่งทาง | แกมช้าง |
| แพนเฝือก้ามกลางนา | นองเครื่อง |
| ท้าวฮุ่งผู้นงหน้า | ฮุ่งจอม ฯ |
| ๓๓๐๘๏ แม่ก็ ละลูกไว้อ้ายเจื่อง | มาเถิง แด่รือ |
| ตูก็ หอมกือนาอยู่งอย | งองถ้า |
| หายามได้วันดี | มื้อปลอด |
| น้องท่านผู้นงหน้า | จิ่งสะเบย ฯ |
| ๓๓๐๙๏ เมื่อนั้น ง้อมฮอดท้าวเทียนข่ำ | บายมือ |
| ดีแก่ ลมเชยพัดกลิ่นหอม | โฮยเฮ้า |
| บาไทเจ้ากือนา | ต้านพี่ |
| ผู่แห่งเหง้าคีงค้อม | คอบวอน ฯ |
| ๓๓๑๐๏ เจียมแต่ น้องจากเจ้าคลาที่ | เชียงเครือ |
| กระสันวอนคึดพี่ไกล | กอยกลั้น |
| อันนึ่ง ใจจงป้าเขือเฮียม | ฮักมาก |
| ขอนโศกฮ้อนหลายชั้น | ใช่ประมาณ ฯ |
| ๓๓๑๑๏ ใจนึ่ง คึดภาคพื้นภายที่ | เงินยาง |
| ใจหนึ่ง ฮมอาการผ่ายเฮียม | ภายบ้าน |
| อวนก็ ทำขวางได้โดยใจ | จงง่าย |
| เมื่อนั้น ง้อมม่วนต้านขานข้อ | ขอบคุณ ฯ |
| ๓๓๑๒๏ พี่อยู่พุ้นคึดคั่ง | คาเคือง |
| คนิงหลายปุนจอดเฮียม | ทังเจ้า |
| อันนึ่ง ฮามเมืองชั้นภายหลัง | ไว้แม่ |
| มาฮอด ผู่ที่เหง้าภายพี้ | เพิ่งบุญ ฯ |
| ๓๓๑๓๏ เมื่อนั้น อั้วควี่ถ้อยต้านตอบ | อวนมโน |
| ภูธรปุนใส่นา | แกวแญ้ |
| เฮียมก็ โรคาแค้นกำเดา | ดาลสวาท |
| เยียวเล่า แส้หมู่ช้างเมือหน้า | พรากไกล ฯ |
| ๓๓๑๔๏ อันนึ่งกลัวพยาธิไข้หนาวเหนื่อย | โรคา |
| ฮมอาลัยชู่ลวง | เลยข้อง |
| เฮียมก็ ระเวระวังฮ้อนฮมทรวง | หลายเยื่อง |
| เมื่อนั้น พระบาทผู้เปนน้อง | ม่ายหัว ฯ |
| ๓๓๑๕๏ ชาดชาดแส้ดาเครื่อง | คลาไป |
| หนัวหนัว ฝูงทาสีส่ำสาว | แลวใช้ |
| พลไหลเข้าเมือเวียง | ระวังราช |
| ท้าวฮุ่งใช้ใจแจ้ง | จอดเฮียม ฯ |
| ๓๓๑๖๏ ดีแก่ชะพู่พร้าวช้อนกาบ | แกมตาล |
| สองนางเทียมจิ่มเจือง | ขวาซ้าย |
| โยธาท้าวคนหาญ | แหนแห่ |
| แม้งนึ่ง เถิงแห่งด้าวเชียงล้าน | ไพร่มวล ฯ |
| ๓๓๑๗๏ พลแผ่เข้าปักตูใหญ่ | เมือเวียง |
| สวนไลตามพาทพิณ | พานสร้าง |
| โฮมพลตั้งหลายแสน | สุมเครื่อง |
| เอาแม่ เจ้าโลกกว้างเมือสู่ | เชียงทอง ฯ |
| ๓๓๑๘๏ เฟื่องๆขึ้นโฮงฮาช | เฮียงกะได |
| เทื่อนั้น เสนาเนานั่งเนือง | ในห้อง ฯ |
| ฮมฮมเชื้องสาวแลว | ไซหมาก |
| ประดับเพื่อนพร้อมปุนน้ำ | โสรจสรง ฯ |
| ๓๓๑๙๏ แม่งวากหน้าขึ้นแท่น | ธรรม์ขวาง |
| เล็งดู ฮงฮงใสส่องคำ | ทุกด้าน |
| อันว่า ดวงปรางค์แก้วบุญกัน | กัมเกิด |
| เอาพี่ เจ้าตี่วสร้อยเมือสู่ | พิมานคำ ฯ |
| ๓๓๒๐๏ กำเนิดนี้เผือขอด | ไมตรี |
| พิมมะบาลฮับพากย์เจือง | จอมไท้ |
| เทพีอั้วเอาอวน | ขึ้นแท่น |
| ประดับดอกแก้วกองไว้ | เลียบลาย ฯ |
| ๓๓๒๑๏ ฝูงแกว่นใช้น้ำโสรจ | สรงสี |
| กองแพงกูอย่าอาย | อันหม้อม |
| สาวเลวเปื้องจามรี | ไกวแกว่ง |
| ง้อมข่ำอั้วถือนิ้ว | บ่วาง ฯ |
| ๓๓๒๒๏ เฮียมก็ พลัดแม่ไว้บ้านแห่ง | เชียงเครือ กี่ดาย |
| เทียวทางไกลหมื่นหลึม | เขาขั้น |
| บัดนี้ มาเห็นเจ้าทังสอง | พร้อมคู่ |
| การที่ชั้นดีฮ้าย | อย่าไล แด่เนอ ฯ |
| ๓๓๒๓๏ ชะพู่หน้าอั้วพี่ | พลอยแหน |
| เฮาใช่ แนวนามไกลเกียรติขาม | แขต้าน |
| ท่อว่า ยังเคืองเบื้องเชียงเครือ | ให้ฮู่ง |
| คึดอ่อนเจ้าทองล้าน | เกิ่งตน ฯ |
| ๓๓๒๔๏ เมื่อนั้น พู่งๆเชื้องใช้พาด | เผือนควาย |
| ญนๆ ยอทะไลจีนแจกปุน | เปนถ้อง |
| นางเมีองอั้วปิปาย | กลอยกล่าว |
| เขาพี่น้องเมือแห่ง | หอทอง ฯ |
| ๓๓๒๕๏ ปุนป่าวด้ำเฮวฮีบ | ฮับขวัญ |
| ยาพองพลัดพรากเฮือน | ฮามท้าว เฮาเนอ |
| แนนพันง้อมงามเปรียว | ขานพี่ |
| ควรที่ป้าท่าน เจ้าติ่วสร้อยมาจ้ำ | แจกพลี ฯ |
| ๓๓๒๖๏ เมื่อนั้น ผู่ที่เหง้านางซึ่ม | ชมหลาน |
| เฮียงสาลีสาดเลียน | ทะไลเข้า |
| พอการเมี้ยนเทลง | ถ้วนหมู่ |
| เตินพวกพร้อมกินแล้ว | เลิกขัน ฯ |
| ๓๓๒๗๏ ชะพู่ตั้งเหล้าแจก | จีนลาย |
| ชะลอนเลียนถี่ถัน | แถวน้ำ |
| ออระชอนป้าปุนฟาย | แควนถี่ |
| สวางสี่ด้าวแดนฟ้า | ช่อยชู ฯ |
| ๓๓๒๘๏ เขาพี่น้องเฮียงฮ่วม | เคหัง |
| วอนสูคูนมิ่งแนน | เมือหน้า |
| ขุนจอมเจ้าขาซาย | ด้ำใหญ่ มากิน |
| คูนก่ำพร้ายืนยิ่ง | ทุกไท ฯ |
| ๓๓๒๙๏ ภูไชยท้าวตายแต่ | เชียงเครือ มากิน |
| เมืองไกลขันค่อยชู | แนนน้อย นั้นแด่ |
| นูเนือนิ้ววางปาน | แล้วอย่า |
| อวนอ่อน เจ้าติ่วสร้อยเชิญน้อง | ฮ่วมสาม ฯ |
| ๓๓๓๐๏ ชะพู่หน้าเจ้ายี่ | ยินสงวน |
| บางามชมแพ่งแค | ดอมเหน้า |
| โสมควรแก้วอามเฝือ | แฝงพี่ |
| ค้ายสิ่งเหง้านางท้าว | นั่งเฮียง ฯ |
| ๓๓๓๑๏ แพ่งๆนิ้วท้าวฮุ่ง | เฮืองแหวน |
| เสียงแจนจัดแจกแค | แถมน้ำ |
| แนนพันสร้อยสีดา | ง้อมม่วน |
| ค้ำฮุ่งห้องเมืองยี่ | ยินวอน ฯ |
| ๓๓๓๒๏ คึดด่วนถ้อยไกลแม่ | นางเมือง |
| ฮอนฮอนใจขาดมา | ยังไส้ |
| เจืองก็ เล็งดูป้าธรรม์ยำ | เอาแพ่ง |
| ไว้อู่แก้วเฮียงฮ่วม | อามคาย ฯ |
| ๓๓๓๓๏ ชู่แห่งพร้อมกินคู่ | เลยลา |
| ทังหลายเจียระจากลง | ลาห้อง |
| แม้งนึ่ง สูรย์คลาค้อยลับเขา | เสมรมาศ |
| เมื่อนั้น อั้วข่ำน้องนางท้าว | สู่สถาน ฯ |
| ๓๓๓๔๏ ชะพาดเหลื้อมขันหมาก | คำแดง |
| ศรีคราญเนาแท่นสูง | สมง้อม |
| เมื่อนั้น กองแพงเหง้ายังอาย | กันอยู่ |
| หมอมหม่อหม้อมยินฮ้าย | ฮูปวอน ฯ |
| ๓๓๓๕๏ ชะพู่เนื้อท้าวฮุ่ง | เฮียงนาง |
| ภูธรกลอยกล่าวโลม | แถมถ้อย |
| เมื่ออวน วางเฮียมฮ้อนเฮฮน | นักซิ่น |
| ง้อมกล่าวเกลี้ยงกลอนซ้อย | ชอบวอน ฯ |
| ๓๓๓๖๏ พี่ก็ หลับตื่นต้านไห้ฮุ่ง | บาไท |
| แคงย่อม เมิลทางงองผ่อคอย | คนใช้ |
| ขวบเมื่อ ฮีไฮฮ้องฮันเสียง | สูรเถื่อน |
| อกพี่ไหม้เหม้อนใบ้ | คอบวอน ฯ |
| ๓๓๓๗๏ สว่าสว่าก้องลมล่วง | โพไทร |
| คอนคอนใจขาดมา | ดอมน้อง |
| พอเมื่อ ไฟเฮืองด้าวภูฮาว | เฮืองเหล่า |
| พี่ย่อมคล้องดาด้ำ | เจี่ยขวัญ ฯ |
| ๓๓๓๘๏ ง้อมกล่าวแล้วท้าวฮีบ | ฮับขาน |
| เปนแต่ กัมกันพลัดพรากเฮือน | ฮามสร้าง |
| เจียมแต่ ทวนเขียวข้ามคีรี | ยาวย่าน |
| เยื้อนซั่นช้างทังไห้ | ฮุ่งเฮียม ฯ |
| ๓๓๓๙๏ พ่างๆน้ำหน้าซ่าน | ซามไหล |
| ลำลำ บายผืนแครงแทบเทียม | ตางเจ้า |
| ฮีไฮฮ้องเฮเสียง | สูรย์สว่าง |
| อกเฮ่งหม้อมเหมือนใบ้ | คอบวอน ฯ |
| ๓๓๔๐๏ หว้ายหว่างไม้มาฮอด | ภูแขม |
| เวราจรแจกไกล | กลอยกลั้น |
| อวนก็ แถมวอนฮ้อนกำเดา | ดาลสวาท |
| คึดชู่ชั้นนฮมเฮื้อ | หอดทรวง ฯ |
| ๓๓๔๑๏ แม้งนึ่ง เถิงแห่งห้องเหวตาด | แดนพาง |
| พลหลวงเขาคว่างเญีย | ภายหน้า |
| อวนก็ วางหนีย้ายพานคำ | คืนเล่า ปางนั้น |
| คองคอบผู้นงหน้า | อุ่นตน ฯ |
| ๓๓๔๒๏ แม้งนึ่ง คอนเท่าม้ามาเทียว | ทวนทัน |
| บนคำสะหาวกล่าวสูง | สมถ้อย |
| ขาพวงพ้นพลอยจัน | เจียรฮอด |
| คอนควี่ถ้อยแถมฮ้อน | เฮ่งคดี ฯ |
| ๓๓๔๓๏ ต้านตื่มถ้อยไห้หอด | หิวแฮง |
| เมื่อนั้น นายพานคำเล่าหนี | ไปพร้อม |
| ว่าจัก กินสารให้ตายมรณ์ | เมี้ยนชั่ว |
| ก็เล่า ไกลอ่อนผู้คีงค้อม | ค่อยคราง ฯ |
| ๓๓๔๔๏ เสิกทั่วท้าวพุ้นเพื่อน | มาทัน |
| ลอนตายผางไป่ดี | ดูฮ้าย |
| ฝูงเขาข้าไทหยัน | หยามใหญ่ |
| เมื่อนั้นน้องค่อย หว้ายป่าไม้มาพร้อม | เพื่อนพล ฯ |
| ๓๓๔๕๏ ทึกพระเนตรย้อยรือใคร่ | ขลังมโน |
| ลอนท่อ ทวานพลายชนหมู่แกว | กลอยม้าง |
| ลุงวางให้เสนโห | ขาพี่ |
| สัจจะผู้ธรรม์อ้าง | ไป่ลืม ฯ |
| ๓๓๔๖๏ แล้วพรากท้าวคลาที่ | เงินยาง |
| ออระทึมเมืองใหญ่ปะกัน | แกวสร้าง |
| เทนางได้สินทอง | ส้อยชั่ง |
| น้องก็ ไว้แห่งผู้ธรรม์อ้าง | อุ่นตน ฯ |
| ๓๓๔๗๏ ไชยโชคล้วนได้ดั่ง | ปรารถนา |
| ทังชุมพูอ่อนมา | มวลไหว้ |
| ดูหลายล้นเหลือตา | เต็มชอบ |
| น้องจิ่ง หว้ายไป่ไม้ทันหมู่ | ยางกาว ฯ |
| ๓๓๔๘๏ ปุนแต่งเต้ามะฮามฮอบ | ทิสา |
| ฮมฮมเขาแขกเมือง | มาไหว้ |
| อันจัก คณนาแท้ดูเหลือ | ล้นลาภ |
| น้องใคร่ได้เห็นหน้า | พี่ตน ฯ |
| ๓๓๔๙๏ สว่าๆเหล้นฟ้อนฟ่าย | ละเม็งสิง |
| คือมีในสวรรค์ที่พรหม | ภายฟ้า |
| ฮาก็ ชูชิงได้โดยใจ | จงง่าย |
| เทื่อนี้ ญูอุ่นผู้คีงค้อม | นั่งปอง ฯ |
| ๓๓๕๐๏ ท้าวกล่าวข้อแขถี่ | แถมวอน |
| เงินทองดูเฮื่อเฮือง | รือไฮ้ |
| ออระชอนท้าวผายเสียง | ต้านพี่ |
| ง้อมม่วนไหว้คูนน้อง | นั่งเทียม ฯ |
| ๓๓๕๑๏ พี่ก็เยียวว่า บ่ได้ผ่านด้าวทังโลก | โลกา ดั่งนี้ |
| เจียมเปนตัวอยู่คอง | คำอ้าง |
| เทื่อนี้ คุณโณแล้วคุณณา | ลุเล่า |
| ญูอยู่สร้างหลายแคว้น | ฮ่วมเฮือน ฯ |
| ๓๓๕๒๏ แม้งนึ่ง ลมเป่งไม้เปื้องช่อ | นายเนือง |
| ดีแก่ เดือนใสแสงส่องบน | ดาวข้อน |
| บาเจืองช้อนคอนาง | ฮัดแทบ |
| ง้อมกล่าวเล้าโลมน้อง | ว่าวอน ฯ |
| ๓๓๕๓๏ ชะแลบเนื้อเนานั่ง | เตงตัก |
| ภูบาลสมเสพกาม | กลอยฟื้น |
| แหนงว่า ฮามฮักน้องนอนเดียว | ดีกว่า |
| หลิ้นเสพเนื้อยังยี่ | ผาเงิน ฯ |
| ๓๓๕๔๏ แม้งนึ่ง ลมลวาดไม้ในป่า | เหมือยฮวาย |
| ฮองๆเดือนส่องลง | ลับฟ้า |
| เล็งดู ภายกระบวนเบื้องตาวันใส | เสด็จฮุ่ง |
| ฮื่นฮื่นข้าภูเฮ่ง | ตีกูน ฯ |
| ๓๓๕๕๏ เสียงพู่งขึ้นดังม่วน | ออระชอน |
| สูระพางตัดส่องดอย | เฮืองฟ้า |
| สะลอนล้วนหลายปุน | ปูสาด |
| ท้าวไถ่ผ้าผืนแขบ | คลาหอ ฯ |
| ๓๓๕๖๏ ชาดชาดพร้อมเจ้ายี่ | ชมงัน |
| ออระควรคีงฮาบงาม | ขาวดั้ว |
| ชะดันพร้อมเต็มโฮง | เชืองถ่าว |
| เฮาจิ่ง กั้วดาบได้แกวแย้ | ส่วยทอง ฯ |
| ๓๓๕๗๏ เจ้าอว่ายหน้ากลอยกล่าว | มุนตรี |
| ฮองฮองวันส่องดอย | ปลงขึ้น |
| เมื่อนั้น บาศรีต้านเก็งญา | พระแม่ |
| เฮาก็ แผวผาบพื้นเมืองแย้ | พ่อคูน ฯ |
| ๓๓๕๘๏ แต่ยี่ ได้ก่ายน้ำใจใคร่ | เมือนา |
| นายทองสูนใส่ใจ | ฟังเจ้า |
| ดีก่อ ปลาชมเหล็นวังใส | แสนหาด |
| เฮาก็ เปนเหง้าท้าวปุนเกื้อ | เกิ่งอินทร์ ฯ |
| ๓๓๕๙๏ ชาดชาดน้ำหน้าแม่ | พลอยตก |
| กินใจ ปานจอมตายเมื่อเจือง | ยังน้อย |
| คึดเมื่อ เฮาทุกข์ไฮ้สินทอง | เฮือนยาก |
| แม่หาก เก็บเผ่าข้อยขายเล้ม | แลกกิน ฯ |
| ๓๓๖๐๏ เถิงเมื่อ แดดส่องต้องตีนท่ง | นาคอง |
| เจืองหาก พากันไปล่อแพน | ทุกมื้อ |
| กูก็ คองวายแท้ลุงจอม | เปนเผ่า กี่ดาย |
| เทื่อนี้ลูกก็ ผาบค้ายได้พลตื้อ | จิ่งขวาง ฯ |
| ๓๓๖๑๏ รือจักให้แม่ เมือปลีกท้าวปานไป่ | มาเถิง นี้เด |
| นางจอมทวยแผ่นแครง | โทมหน้า |
| ท่อว่า ฮมเพิงห้องเมืองปะกัน | แกวราช |
| ค้ายไพร่ฟ้าหลายล้น | อยู่วอน ฯ |
| ๓๓๖๒๏ ชะพู่หน้าพอหมื่น | นางแกว |
| โสมควรคีงลูกแมน | ผิวเผี้ยน |
| ทาสีพร้อมทาสา | ใช้ช่วง |
| ฮุ่งค่ำเที้ยนคองเจ้า | ที่ยำ ฯ |
| ๓๓๖๓๏ ดีก่อ ลมล่วงพร้าวเปื้องช่อ | ใบบาน |
| ปุนคำควรกล่าวจอม | ทังง้อม |
| หาญพายพร้อมอาวพอง | พลสว่าย |
| ไหว้ท่านเจ้าทองล้าน | ชู่ประการ ฯ |
| ๓๓๖๔๏ เจ้าอว่ายหน้าเส็งสิ่ง | โยธา |
| หาญพาย ทังแองคอนใส่ใจ | จำถ้อย |
| สูเญียะ เมือทูลไหว้ราชา | ลุงออก กูนั้น |
| น้องท่าน เจ้าติ่วสร้อยมาฮอด | เงินยาง ฯ |
| ๓๓๖๕๏ ยังท่อ คึดขอกห้องหนแห่ง | เมืองปะกัน |
| มาดาเมื่ออยู่แขวง | ขนันข้า |
| เขาก็ เฮวฮันไหว้ราชา | ท้าวซึ่ม |
| ป้าอยู่อ้อมเทียมท้าว | ที่เดียว ฯ |
| ๓๓๖๖๏ ต้านตื่มข้อเจืองสั่ง | เสด็จการ |
| เกลียวความลุงกล่าวถอง | เถิงท้าว |
| สูค่อย ทวานความไหว้หลานกู | กอยพากย์ |
| ไหว้แม่ เจ้าหมื่นม้าวเมื่อก่ง | เมืองปะกัน ฯ |
| ๓๓๖๗๏ ท่อว่า ล่ำบากด้วยดอมมิ่ง | มาดา |
| ไกลพงศ์พันธุ์อยู่วอน | แวนหม้อม |
| ฮู้ว่า คุณนาแท้ดวงเดียว | ดูประเสริฐ |
| แม่ท่าน เมืออยู่ป้องแขงท้าว | ก่งเมือง ฯ |
| ๓๓๖๘๏ ที่นั้น ดูเลิศล้นยังยิ่ง | นครสวรรค์ |
| เขาก็ ทวานความคืนคอบเจือง | จอมไท้ |
| เทื่อนี้ลุงก็ โดยคำท้าวทุกอัน | ถ้วนพากย์ |
| ใคร้กล่าวถ้อยลุงป้า | ชู่อัน ฯ |
| ๓๓๖๙๏ ทุกปากช้างเฮืองข่าว | ปุนความ |
| เตินนายกองพวกครัว | ยามเช้า |
| โสมพราวอั้วอามคาย | คำสวาท |
| ง้อมม่วน เจ้าติ่วสร้อยฮมฮ้อน | คู่ควัน ฯ |
| ๓๓๗๐๏ แม้งนึ่ง สูรย์คลาดค้อยลับเหล่า | เสียแสง |
| เสียงนันคนเลิกลา | ลงห้อง |
| หุมแพงเข้าเมือใน | เมี้ยนแท่น |
| ง้อมม่วน ผู่จิ่งหน้าเทียมน้อง | บ่คลา ฯ |
| ๓๓๗๑๏ สูรย์พุ่งขึ้นเขาขอบ | ยุคันธร |
| ดาราเฮืองเฮื่อเดือน | ดาวดั้ง |
| แม้งนึ่ง ลมออนเปื้องพรึกสา | หนาวหน่วง |
| ฝูงพวกน้อยปุนตั้ง | แต่งครัว ฯ |
| ๓๓๗๒๏ สูรย์พุ่งขึ้นฮ้อนเฮื่อ | เฮืองแสง |
| หนัวๆควาญคาดพลาย | ลงล้าง |
| นงแพงเจ้ากือเมือง | เมี้ยนอาบ |
| ผู่ที่อ้างเมือห้อง | แห่งจอม ฯ |
| ๓๓๗๓๏ โสมฮาบอั้วง้อมม่วน | อามคาย |
| เขาก็ ทนระแดดอมเดือดกระหาย | หิวไห้ |
| ทังหลายพร้อมนางแกว | นงถ่าว |
| ไหว้แม่ผู้คีงค้อม | คั่งสถาน ฯ |
| ๓๓๗๔๏ ค่าวๆหน้าท้าวฮุ่ง | ฮมมะนา |
| นางจอม ทรงบันดาลเดือดแด | ดาลข้อง |
| โสภาเหน้าแพงศรี | อั้วค่า |
| เมื่อนั้น ป้าซึ่มเต้าเถิงน้อง | ข่ำมือ ฯ |
| ๓๓๗๕๏ คองว่า ได้อยู่ห้องหนแห่ง | เมืองเดียว กี่ดาย |
| เลยจักกือหาญ เมือเชียงทองพรากตู | ไกลหน้า |
| เล็งเห็น งาเฮียวห้างพันตัว | ตั้งเครื่อง |
| คื่นคื่นม้าควาญห้าง | หิ่งนัน ฯ |
| ๓๓๗๖๏ หนักเหนื่องเค้าคับคั่ง | โฮงทอง |
| แกงควายสุกหมื่นถัน | แถมส้า |
| เจืองก็ ปุนปองให้เมือหา | ลุงซึ่ม |
| เมี้ยนแต่งพร้อมพันเหล้า | หมื่นหาม ฯ |
| ๓๓๗๗๏ ต้านตื่มข้อแขม่วน | ชมหัว |
| สาลีตามลาดเลียน | ทะไลเข้า |
| หนัวๆเที้ยนคนนัน | ในอาสน์ |
| ท้าวฮุ่ง เจ้าติ่วสร้อยเชิญแม่ | กินงาย ฯ |
| ๓๓๗๘๏ ชะพาดพร้อมเหน้านั่ง | แฮเฮียง |
| ตอมเผือนควายหมื่นตัว | กินแล้ว |
| โงงโงงค้องเสียงกลอง | เกาพาท |
| เมื่อนั้น อั้วอ่อนเจ้าทังง้อม | ม่วนเมือง ฯ |
| ๓๓๗๙๏ เขาก็ ทูลพาทไหว้พระแม่ | มาดา |
| ยินเคืองทุกข์ซู่ลวง | หิวไห้ |
| เก็งญาผู้ธรรม์ยำ | พระแม่ |
| เมี้ยนสั่งถ้อยแถลงไว้ | ชู่คอง ฯ |
| ๓๓๘๐๏ เจียมแต่ มาฮอดห้องหนแห่ง | เงินยาง |
| ฮมเพิงภายอ่อนอวน | นงหน้า |
| อวนก็ ขวางใจแจ้งวิญญาณ | ยินชื่น |
| คือคู่ ได้ผ่านพื้นพิมานฟ้า | นั่งปุน ฯ |
| ๓๓๘๑๏ หลับตื่นแล้วเห็นเผ่า | พงศา |
| แวนบ่ มีอาดูรเดือดแด | ดูแจ้ง |
| อันนึ่ง เฮียมกูผู้ผาโล | ท้าวซึ่ม |
| เทื่อนี้น้องจัก ไปอยู่พุ้นภายแญ้ | เพื่อนแกว ฯ |
| ๓๓๘๒๏ ต้านตื่มข้อแขชอบ | ชักคดี |
| เอามา เปนแนวนามดั่งรือ | เคยคุ้น |
| เทพีอั้วทังหลาย | ไห้หอด |
| นับว่า เมืออยู่พุ้นความหลู้ย | หล่าหลง ฯ |
| ๓๓๘๓๏ ยอดมิ่งง้อมอั้วค่า | อามคาย |
| แถนปลงลงชั่งมา | ดอมน้อง |
| อันหนึ่ง เฮียมกูผู้บุญผาย | พร้อมเกิด |
| หมั้นอยู่ห้องคงแท้ | เที่ยงสถาน ฯ |
| ๓๓๘๔๏ ประเสริฐเนื้อท้าวฮู่ง | เจืองหาญ |
| โพยภัยสังอย่าเบียน | บุญเจ้า |
| ปรากฏก้ำหิมพาน | ไชยะเยศ |
| พลคั่งเค้าทังค้าย | ท่วยไท ฯ |
| ๓๓๘๕๏ เนียนเนียนเนื้อภูธร | ทนสวาท |
| ป้าซึ่มกลั้นกลอยไห้ | ฮูงวอน ฯ |
| ๓๓๘๖๏ พระราชเมี้ยนกลอยกล่าว | นางมุน |
| โสมคราญคือคู่เหลา | ผิวเผี้ยน |
| พระกายกะกุลก้ำเม็งจีน | เจ้าแม่ |
| เมี้ยนมอบให้เมือพร้อม | เพื่อนเฮา ฯ |
| ๓๓๘๗๏ พระบาทท้าวต้านแม่ | ทุกประการ |
| บ่กว่า เร็งโญญาณค่อยถนอม | โลมต้าน |
| บุญผายผู้นางเมือง | พระแม่ |
| ไห้หอดอุ้มบาท้าว | ข่ำขวัญ ฯ |
| ๓๓๘๘๏ สะบัดไชยก้องเถิงที่ | นาที |
| พลแพนมวลออกเวิง | วังกว้าง |
| พิมมะบาลให้ตีกลอง | ย้ายก่อน |
| คื่นคื่นช้างหลายฮ้อย | เครื่องคำ๑ ฯ |
| ๓๓๘๙๏ ขวบเมื่อ เดือนสามค้อยเผลียงฮวาย | ฮำเทศ |
| ทุกด่านด้าวดงไม้ | ดอกเงย ฯ |
| ๓๓๙๐๏ เปนขอกห้วยหลายหมู่ | มาลา |
| ลมพานเผยกลิ่นละออง | โฮยเฮ้า |
| ราชาเจ้าเจืองหาญ | หุมมาก |
| คึดใคร่ นำดอกไม้ไปเฮ้า | ม่วนไพร ฯ |
| ๓๓๙๑๏ ภูไชยท้าวเตินป่าว | ทังหลาย |
| เฮาจัก ยอพลหลวงพรากไป | วันหน้า |
| หาญพายผู้เปนแสน | ตางราช |
| ตกแต่งพร้อมขวาซ้าย | ชู่ประการ ฯ |
| ๓๓๙๒๏ น้องนาถผู้ต่างยี่ | แองคอน |
| ทังขุนซายอ่อนคาน | เนาใกล้ |
| สะพาดพร้อมเสนา | ฮับพากย์ |
| ควรที่ ภูไชยท้าวเสด็จพุ่ง | ยอไป ชอบแล้ว ฯ |
| ๓๓๙๓๏ แต่นั้น พระบาทใช้สองอ่อน | โดยทัน |
| เขือจ่ง เมือหอสูงกล่าวนาง | ในห้อง |
| แหนแก่ โสมสันง้อมมเหสี | นางนาถ กูเนอ |
| ขาพี่น้องทังอั้ว | อู่อาม ฯ |
| ๓๓๙๔๏ จักใคร่ ไปคาดหลิ้นน้ำดอก | ในไพร |
| เชิญนางงามชู่คน | ไปเฮ้า |
| ทังปวงพร้อมสนมหลาย | ไปม่วน |
| จักพรากพี้ยามเช้า | ล่วงไป ว่าเนอ ฯ |
| ๓๓๙๕๏ ให้ด่วนเต้าตอมแต่ | ยามงาย |
| ทังคำสายฮีบไป | เตินน้อง |
| มันนั้น เปนสายเชื้อคอนซาย | เชื้อแม่ |
| ปุนใหญ่หน้าผางท้าว | ใช่เท็ง ฯ |
| ๓๓๙๖๏ ท่อแต่ได้สิบขวบ | เมือหอ |
| ฮามมาดาใหญ่เอง | ดอมท้าว |
| ขาก็ หิงๆเข้าเมือเถิง | ง้อมม่วน |
| ทุกที่พร้อมนางเหน้า | หนุ่มปะกัน ฯ |
| ๓๓๙๗๏ เจ้าอู่แก้วเปนอาช | อวนเขา |
| ทังหลายเมือนั่งเนือง | นางท้าว |
| แต่นั้น สองขาเข้าประนมกร | นบบาท |
| น้าวซู่ถ้อยคำเจ้า | สั่งเถิง ฯ |
| ๓๓๙๘๏ บัดนี้ พระราชท้าวสถิตนั่ง | เบงชร |
| ฮมเพิง มีความสอนใส่หัว | ฝูงข้อย |
| ดูดั่ง เดือนจรข้อนมาลา | ฮสฮ่วง |
| ระดูดอกไม้บานฮ้อย | แค่ไพร ฯ |
| ๓๓๙๙๏ จักล่วงเท้าเสด็จฮอด | เชียงขวัญ |
| อังเชิญพระยอดนาง | ไปพร้อม |
| กับทัง สีสันเชื้อนางแกว | แก้วอู่ |
| สนมหนุ่มล้อมฝูงเหน้า | คู่นาง ฯ |
| ๓๔๐๐๏ เมื่อนั้น ชะพู่หน้าง้อมม่วน | ฮับขาน |
| โดยบุญขวางแต่งไป | เติมเจ้า |
| นางหลายพร้อมเต็มสถาน | ฮับกล่าว |
| ตูก็โดยอาช พระนั่งเกล้าไปถ้วน | คู่นาง ฯ |
-
๑. เนื้อความตอนนี้ขาดไปไม่ติดต่อกัน ↩
